عمو ممكن تاخدني اعيش معاك في بيتك ؟

- عمو ممكن تاخدني اعيش معاك في بيتك ؟ 
- بصلها من فوق لتحت وقال: امشي من هنا يا بت مش ناقصة قرف على الصبح
- عيطت وقالت انا مليش بيت دلوقتي ممكن تاخدني اعيش عندكم
- لا حول ولا قوه الا بالله انتي يا بنتي مبتفهميش مش قولتلك امشي من هنا انا ورايا كوم لحم هتزيد واحده عليهم شوفي طريقك يا بنتي الله يسهلك 
- مشيت وهي بتعيط والدنيا بتخبط فيها يمين وشمال.. هتروح فين بعد ما أقرب الناس ليها اتخلي عنها.. 
- قعدت على الرصيف بتعيط بصت لقت أطفال اللي منهم بيمسح عربيات واللي بيبيع مناديل 
فجأة لقت ايد بتتمدلها وبنت صغيره بتقول: خدي لقطي رزقك وبطلي عياط 

مدت اديها وأخدت منها الفوطه وقالت: اعمل اي ؟! 
- لا دا انتي شكلك جديده وملكيش في البهدله خالص وسابتها ومشيت 
- قعدت تاني على الرصيف تتابع اللي رايح واللي جاي عيطت اكتر لما لقت الأهل بتضحك وتهز مع ولادها..

- قامت تتمشي يمكن تلاقي حد ياخدها معاه وتسكن عنده بدل اللي راح 
- عمو ممكن تاخدني اعيش معاك في بيتكم؟! 
بصلها وقال: انتي اسمك اي 
إستبرق اسمي إستبرق
- اسمك غريب أوي اول مره اسمعه ؟ فين أهلك لي سايبينك ماشيه لوحدك كدا انتي عندك كام سنه؟ 
إستبرق: اهلي ماتوا وأخويا اتخلي عني وسابني في الشارع وانا عندي ١٢ سنه.

- طب يا حبيبتي انا للأسف مش هقدر اخدك معايا البيت ممكن تشوفي حد تاني تعرضي يمكن حد مقتدر ياخدك 
هزت رأسها بخيبه أمل ومشيت 
- حسبي الله ونعم الوكيل هو في كدا الأخ بيرمي أخته ربنا يردهالك يا شيخ البت مش وش مرمطه
- ها يا حسام عملت اي
خلاص يا دعاء سبتها في الشارع وجيت يا ريت بقي تتهدي شوية وسرح شوية ودخل في حوار مع نفسه بقي دي أمانه أبوك وامك ليك ؟ ترمي اختك في الشارع؟ بس دعاء مش مستحملاها في البيت وكل يوم دوشه ونكد عشانها والمصريف برضوا كتير